ਅੱਜ ਜਦੋਂ ਮੈਂ
ਬੌਣੀ ਧੁਪ ਦਾ ਠਿਗਨਾ ਸਾਇਆ
ਤੇਰੀ ਅੱਗ ਥੀਂ ਹੋਠ ਛੁਹਾਇਆ
ਮੇਰਾ ਅੰਗ ਅੰਗ ਨਸ਼ਿਆਇਆ
ਮੈਂ ਨਿਰ-ਅੰਗਾ
ਨਿਰ ਅੰਗੀਆ ਸੋਚਾਂ ਦੀ ਕਾਇਆ
ਝੂਠੇ ਕੌਲਾਂ ਥੀਂ ਪ੍ਰਣਾਇਆ
ਅੱਜ ਤੇਰੇ ਬੂਹੇ ਤੇ ਆਇਆ --
ਹੇ ਕਿਰਨਾ ਦੇ ਮਰਦ ਅਗੰਮੜੇ
ਇੱਕ ਘੁੱਟ ਦੇ ਕਿਰਨਾਂ ਦੀ ਕਾਇਆ
ਇੱਕ ਲੱਪ ਦੇ ਧੁਪਾਂ ਦਾ ਸਾਇਆ
ਮੈਂ ਵੀ ਮੇਰੇ ਹੌਸਲਿਆਂ ਵਤ
ਨਗਨ ਖੜਗ ਤੇ ਟੁਰਨਾ ਸਿੱਖਾਂ
ਮੈਂ ਵੀ ਸਿੱਖਾਂ --
ਕਿੰਜ ਟੁਰਦੀ ਹੈ ਧਾਰ ਲਹੂ ਦੀ
ਬੰਨ ਕੇ ਗੁੱਟ ਤੇ ਸੂਹਾ ਗਾਨਾ
ਕਿੰਜ ਟੁਰਦੇ ਨੇ --
ਕੁਰਬਾਨੀ ਦੇ ਪੁੰਜ ਅਕੀਦੇ ਮਕਤਲ ਵੱਲ ਨੂੰ
ਅੱਜ ਦੇ ਦਿਹੁੰ
ਬੱਸ ਇੱਕੋ ਵਰ ਦੇ ,
ਹੇ ਕਿਰਨਾਂ ਦੇ ਮਰਦ ਅਗੰਮੜੇ
ਚਾਨਣੀਆਂ ਦਾ ਸੁਰਖ ਮੁਆਤਾ
ਮੇਰੇ ਸੁੱਤੇ ਸਾਹੀੰ ਧਰਦੇ .
No comments:
Post a Comment